रिक्षावाल्याक म्हैन्याक आठ लाख
सकलो : रिक्षावालो म्हैन्याक आठ लाख रुपये कमवता असा तुका म्हणाचा आसा की काय?
तुकलो : व्हय रे. मुंबईत येक रिक्षावालो दिवसाक वीस ते तीस हजार कमवता. जवळपास म्हैन्याक आठ लाख कमवता म्हणे.
सकलो : काय सांगतस? म्हंजे तो रिक्षा किती येळ चालवता? किती रिक्षा चारवता?
तुकलो : अरे बाबा, तो मुळात रिक्षा चालवनाच नाय. नुसतो रस्त्याच्या कडेक रिक्षा उभो करता आनी दिवसाक वीस ते तीस हजार कमवता.
सकलो : जुगार, मटको, सोरो ईकता की काय? वीस-तीस हजार कमवक करता काय?
तुकलो : अक्कल आसात तर आजकाल पैसे कमवक नुसती गाढवासारखी मेहनत करूची गरज नाय. ग्राहकांची गरज वळखून धंदो केलो तर माणूस मालामाल होवक शकता.
सकलो : अरे पण तो रिक्षावालो करता तरी काय? ता तरी सांग?
तुकलो : अरे बाबा, तो रिक्षावालो जाम व्हायरल झालेलो आसा. म्हैन्याक आठ लाख कमवना म्हंजे खावची गोष्ट नाय.
सकलो : खरा आसा. शिवाय रिक्षा चालवचे आदी रिक्षावालो म्हैन्याक
आठ लाख कमवता कसे? ता आयकाक मी उतावीळ झालय. मी सुद्धा जय जावन रिक्षा लावतय.
तुकलो माका वाटलेलाच तुझ्यासाखे ईचार करणारे आजून खूपच आसतले. तो रिक्षा उभो करता तेच्या आजूबाजूक रिक्षाची उभी रांग लागतली. मेल्यानू तुमचा डोक्या चालवा आनी तुमी दुसरो धंदो चालू करा.
सकलो आदी तो रिक्षावालो काय करता ता आमका सांग? रिक्षेत जादूचे प्रयोग करता की काय?
तुकलो तो रिक्षावालो व्हिसा ऑफिसच्या समोर रस्त्याच्या कडेक रिक्षा उभी करता आनी त्या ऑफिसात येणाऱ्या माणसांची महत्त्वाची कागदपत्रा आनी वस्तू आसतत त्यो सांभाळता. तेच्या मोबदल्यात तो येक हजार रुपये घेता.
सकलो काय सांगतस? भारीच मरे. आपणसुद्धा जिल्हा कार्यालयाच्या भायर रिक्षा लावन हेल्मेट सुखरूप ठेवचेसाठी धा-वीस रुपये घेवक हरकत नाय.
तुकलो: हरकत नाय किमान इतकी अक्कल तुका सुचली. आसलेला डोक्या चालवा आनी वापरा आनी पैसे कमवा, असो संदेशच त्या रिक्षावल्यान तुमका आमका दिलेलो आसा.
Comments
Post a Comment